Archive for the ‘fotografía e audiovisual’ Category

Horreur

Xoves, Febreiro 6th, 2014

Nas zonas de transición entre o rural e o industrial hai un conflito desequilibrado.

Lua de Abril (Língua)

Venres, Maio 17th, 2013

(foto-haiku para concurso da Gentalha do Pichel)

porque me sabes

levo-te com gorência

no ceu da boca

Conta-minas

Venres, Decembro 28th, 2012

(fotografía finalista do certame ‘Fotografías polo territorio’ 2012)

Courel, Terra Chá, Pico Vello, Corcoesto… Xa non queremos contar máis. Un pequeno grupo de corporacións transnacionais, principalmente mineiro-extractoras, controla a economía global. E parece que escolleron este País para furar o noso futuro impunemente…

Eu nunca serei yo

Sábado, Xuño 30th, 2012

(fotografía gañadora do certame ‘Unha imaxe para o galego’ 2008)

Co galego… ata o inferno

Venres, Xuño 29th, 2012

(curtametraxe gañadora do certame ’24 horas galego fullscreen’ 2010)

Os Loisíadas

Xoves, Xuño 28th, 2012

(publicado em Diário Liberdade o 4 Abril de 2011)

A última vez que se tinha sentido com tanta força a presença de Lois Pereiro em Compostela fora no concerto tributo aos Radio Océano do ano passado, quando Johnny Rotring (Xosé Manuel Pereiro) cantava ‘Narcisismo’ junto com a mítica banda dos 80. No passado 31 de março, novamente na Sala Nasa, pugemos em xeque a balança entre a mistificaçom do artista e a comuniom com o seu legado, mas o peso da sua obra nom nos deixa elevá-lo ao sublime e resiste-se a ficar entre nos, desafiante.

“A sua escritura desativa por si mesma todas essas cuchipandas”, em palavras do Leo. Assim, o tributo a Lois Pereiro fez que a verdadeiramente sublimada fora a festa, a música, a literatura galega e a própria poesia.

O chévere Manuel Cortés apresentou o elenco musical, e Manu Clavijo desprendeu com classe as primeiras notas da noite. Um foco imaginário iluminava algum recanto impossível onde o poeta mais punk gostaria de escuitar e de espreitar, e seica Lois era um observador implacável. Desta volta nom assistiu a polícia, como fizera no tributo a Lois Pereiro no Borrazás da Corunha, para deixar constância do incomodo que segue a ser o seu espírito.

No descanso das bandas, entre cervejas e leituras fugazes da ‘Poesia última de amor e enfermidade’, escuitava declaraçons dos mais achegados. Segundo o seu irmao, embora as desgraças que lhe puderam ter acontecido, Lois era umha pessoa muito divertida, e pode que essa profunda alegria, retranca e fúria seja o que impregna hoje este tipo de celebraçons. Para Anton Losada “todos os poetas recordam a alguém, mas Lois Pereiro só me recorda a Lois Pereiro”.

O inovador projecto musical Das Kapital, que este ano apresentará disco, foi depois o encarregado de recuperar ‘Narcisismo’, esse cru poema musicado onde o latejar do autor se converte em percussom: “Sigo os passos do sangue no meu corpo”…

Fora de cena, quem também integra o projeto audiovisual ‘Nom saímos do lixo’, imaginava o que nos poderia dar o Lois Pereiro roteirista, cronista irônico de humor incorreto.

O último grupo em saltar à cena foi Ondas Martenot. Mençom à parte merece este que poderíamos chamar projeto póstumo do Lois: O Leo i Arremecaghona, Cristina (do Sonoro Maxín, que também terá disco este ano) e Fran mais Antón (que venhem de estrear disco de Ulträqäns no AchegArte), tocárom o que Lois, “que tinha o subconsciente colonizado polo rock’n’roll”, quereria ouvir.

A emotividade ganhou graus quando Josito Pereiro se somou com a sua voz a completar o repertório. Ecoou na sala o ‘Perfect day’ de Lou Reed com reminiscências de Fuxan os Ventos, e o momento lusista deixou-se sentir ao som do ‘Como o vento’ de Radio Océano e do ‘Venham mais cinco’ do Zeca Afonso.

A despedida soube a agradecimento, pois umha pessoa que foi sem se queixar de nada, deixou em nós carinho nom condescendente e ganas de viver desesperadas. Chama a atençom a festividade desta iniciativa civil nom subvencionada, no ano mais valente e menos institucionalizado da história dum rejuvenescido Dia das Letras Galegas.

E chama a atençom especialmente o elevado nível de apropriamento da obra por parte das novas geraçons, quiçá, pola contemporaneidade do escritor e também pola modernidade alternativa e compromisso libertário que esconde.

Isto é o que transmite este fresco espetáculo tributo a Lois Pereiro, e estas som as vindouras paradas:

22 de abril. Local Social A Rebusca de Maceda (Terra de Trives).

30 de abril. Ato de Causa Galiza em Lugo.

7 de maio. Naraio (Trasancos).

12 de maio. Antigo cárcere da Corunha.

13 de maio. Muimenta (Terra Chá).

14 de maio. Parque Santa Margarida da Corunha.

16 de maio. Ourense.

Galeria fotográfica:

 

Unha imaxe para o decreto do galego

Martes, Xaneiro 5th, 2010

Fotografía participante no certame ‘Unha imaxe para o galego 2009‘ do xornal dixital Vieiros en colaboración coa S. X. de Política Lingüística: ‘Perigo! (os galegófobos ateigan as carnicerías)’

*

Moito e ben se falou xa da improvisada e fuxidía apresentación do borrador do decreto ‘borrador’ do galego…

O sociólogo Fermín Bouza Álvarez incidía nos irrecuperábeis guetos urbanos monolingües en castelán; o mestre Valentim R. Fagim afondaba no desaproveitamento da nosa potencialidade lingüística; o escritor Agustín Fernández Paz numeraba 6 pontos que a modo teolóxico se poderían resumir en dous: ilegalidade estatutaria e ausencia de ética democrática; Manuel Bragado asegurou que lle escorreron as bágoas pola face ao ter coñecemento do texto, pois dóelle a lingua e mailo peto (hai que ter en conta que o mundo editorial galego xa fora atacado polo goberno feixista coa eliminación das axudas para tradución); e quizais, Filipe Díez, fixo o desmiuzamento máis completo do documento. Mesmo se ideou na rede unha orixinal teoría do 33+17% de galego-portugués no ensino co novo decreto.

Mais este polémico bosquexo estaba falto de acompañamento visual. E ante a ausencia dunha boa fotografía de familia, que deixara na diana da Historia aos perpetradores da infamia -cal trío das Azores-, nada mellor que a metáfora dun sentimento colectivo: o obxectivo da galegofobia feito carne.